Framfaraverðlaun Dalbúa 2014

Á aðalfundi golfklúbbsins Dalbúa 2014, sem haldinn var 29. október sl., afhenti Eiríkur Þorláksson, formaður forgjafarnefndar, framfaraverðlaun Dalbúa, en þau voru nú veitt í fjórða skipti.

Að þessu sinni komu verðlaunin í hlut Jóns Gunnarssonar, en hann lækkaði forgjöf sína frá 1. janúar til 1. október úr 12,4 í 8,9 eða um 3,5 og voru það mestu framfarirnar sem urðu meðal félagsmanna á árinu samkvæmt þeirri reikniformúlu sem lögð er til grundvallar.
- Jón, sem er aðeins þrettán ára gamall, er nánast uppalinn í golfinu á vellinum í Miðdal. Hann var ekki hár í loftinu þegar hann lék þar fyrstu hringina með foreldrum sínum, Gunnari Jónssyni og Kristínu Þórisdóttur, og móðurforeldrum, þeim Þóri Ólafssyni og Ingunni Valtýsdóttur, sem hafa verið meðal ötulla Dalbúa nær frá upphafi.
Með því að vinna til framfaraverðlauna Dalbúa 2014 bætist Jón Gunnarsson (f. 2001) í hóp verðugra táninga, sem hafa unnið til þessarra verðlauna síðustu ár. Þegar þau voru afhent í fyrsta sinn árið 2011 hlaut þau Bragi Arnason (f. 1997), þá aðeins 14 ára gamall, en síðustu tvö ár komu þau í hlut Kristófers Dags Sigurðssonar (f. 1998), var einnig 14 ára þegar hann hlaut þessi verðlaun í fyrsta skipti. - Það er því ljóst að unglingarnir sem spila innan klúbbsins haf verið að taka miklum framförum síðustu ár.
Stjórn golfklúbbsins Dalbúa óskar Jóni Gunnarssyni til hamingju með að hafa hlotið Framfaraverðlaun Dalbúa árið 2014, og óskar honum sömuleiðis alls velfarnaðar á golfvellinum í framtíðinni.

Páll Þórir Ólafsson, form.